Margot : Rechercher
Margot: que le bien set et entent
Text: Campsey 13 (Kth) : Clemence de Barking, Vie de s. Katherine
246r
Fol. 246ra
La Vie sainte Katherine
par
Clemence de Barking
fol.
246r
Ici comence la vie sainte Katerine
Kth1 Cil que le bien set et entent
Kth2 Demustrer le deit sagement,
Kth3 Ke par le fruit de sa bunté
Kth4 Seient li autre amonesté
Kth5 De bien faire, de bien voilier
Kth6 Solunc iceo que unt le poer.
Kth7 Kar cil ke sul est bon de sei
Kth8 A nus donat example e lei;
Kth9 Sa bunté ne nus vout celer,
Kth10 Mais comunement demustrer.
Kth11 De son bien est ke suffit a chascun
Kth12 Kar il est sul a tuz commun.
Kth13 De sa grant largesce nus paist
Kth14 Et tut nostre bien de son naist.
Kth15 Bonurez est qui se alie
Kth16 Et a cel grant bien son quer plie
Kth17 Que mueisun de tens ne mue
Kth18 Ne lei ne reprent ne argue.
Kth19 Unkes a nul ne vout faillir
Kth20 Ke de lui amer eit desir.
Kth21 Mut ad en lui riche conquest
Kth22 Ki tuz jurz fu et ert et est.
Kth23 Ore le prium par sa duçur
Kth24 Kil nus doinst faire tel labur
Kth25 Et ensuire ici issi sa trace,
Kth26 Ke la le puissum ver face a face
Kth27 U il regne en sa majesté
Kth28 Uns Deus en sa trinité.
Kth29 Pur sa pité me deit aider
Kth30 A cest ovre ke voil traiter
Fol. 246rb
Kth31 De une sue veraie amie,
Kth32 Dunt translater voil sa vie,
Kth33 De latin espundre en romanz
Kth34 Pur ceo ke plus plaise as oanz.
Kth35 Ele fu jadis translaté
Kth36 Solunc le tens ordené;
Kth37 Mes ne furent dunc si veisdus
Kth38 Les homes, ne si envius
Kth39 Cum il sunt al tens de ore
Kth40 Et aprés lui serrunt uncore.
Kth41 Pur ceo ke le tens est mué
Kth42 Et des homes la qualité
Kth43 Et la rime vile tenue
Kth44 Kar ele est aukes corumpue.
Kth45 Pur ceo lestut amender
Kth46 Et le tens solunc la gent user.
Kth47 Ne lamend pas pur mun orgoil,
Kth48 Kar preisé estre nen voil;
Kth49 Il sul en deit lo[e]nge aveir
Kth50 De ki sent mun povere saveir.
Kth51 Si cum les estories nus dient
Kth52 Ki les anciens faiz desplient,
Kth53 En Rome out ja un emperur
Kth54 Ki mut par ert de grant vigur.
Kth55 Constantins out nun sis pere,
Kth56 La bone Heleine fu sa mere.
Kth57 Al meismes out nun Costantin;
Kth58 A lui fu tut le regne aclin.
Kth59 A seinte eglise pais duna
Kth60 Aprés les dis anz kil regna.
Kth61 Icist Maxentiun venqui
Kth62 Ke son regne out a tort saisi.
Kth63 Vers Alexandre le chaça
Kth64 U il trent[e] cinc anz regna.